Ağ Qərənfil Üçün Təziyə

Həmid Piriyevin yeni kitabına eyniadlı poema və “Abşeron hekayələri” silsiləsi daxildir. Şüur axını üslubunda yazılmış “Ağ qərənfil üçün təziyə” poeması yaddaş haqqındadır. Yeganə oğlunun ölümü Ramiz müəllimin yaddaşını oyadır və o, unutduğunu zənn etdiyi xatirələrlə, keçmişin detalları ilə üz-üzə qalır. Hər xatirə, hər detal bir ştrixi yerinə qoyur və getdikcə personajın obrazı gözümüzdə bütövləşir. “Abşeron hekayələri” silsiləsinə 10 hekayə daxildir. Sadə adamların gündəlik həyatından, məşğuliyyətindən bəhs edən hekayələrin personajları hamımızın dəfələrlə, bəlkə də, hər gün gördüyümüz, amma adətən fikir vermədiyimiz, yanından saymazyana keçdiyimiz insanlardır. “Həmidin hekayələri mənim üçün sözün həqiqi mənasında əsl tapıntı idi. Nəhayət ki, Bakı kəndlərinin həqiqi, düzü düz, əyrini əyri təsvirlərinə, Bakı kəndlərinin koloritinə, şeiriyyətinə nəsrdə rast gəlmişdim. Həmidin hekayələrində səs-küy, ən əsası zərrə qədər də pafos, psevdolirika yoxdur. Nəsr haqqında təsəvvürləri səthi olan, nəsri bilməyən adamlar Həmidin hekayələrini oxusalar, yəqin ki, çox, lap çox məyus olacaqlar. Çünki Həmidin hekayələrində hər şey çox sakitcə baş verir və Həmid adamların daha çox adi günlərindən, adi saatlarından, həyatın adi ahəngindən yazır”. Seymur Baycan