Yorulmaz Əkinçi

Tanınmış ədəbiyyatşünas-alim və diplomat Vilayət Quliyevin milli mətbuatımızın banisi barədəki yeni kitabına müəllifin müxtəlif illəri əhatə edən araşdırmaları ilə yanaşı, Həsən bəy Zərdabinin dövrü, mühiti, şəxsiyyəti, fəaliyyəti haqqında çoxsaylı sənədlər və ilkin mənbələr – memuarlar, məktublar, məqalələr daxildir. Bu sırada Həsən bəyin kürəkəni Əlimərdan bəy Topçubaşovun, həyat yoldaşı Hənifə xanım Məlikovanın, qızı Qəribsoltan Məlikovanın, habelə müasirlərinin və ozamankı mətbuatın böyük ziyalımız haqda xatirələrini və fikirlərini xüsusi qeyd etmək gərəkdir. Mirzə Fətəli Axundzadənin iki məktubu istisna olmaqla bütün digər materiallar ruscadan tərcümə edilib. Bu ədəbi-tarixi sənədlər məcmu halında yalnız “Əkinçi” qəzeti və Həsən bəy haqda yox, bütünlükdə XIX əsrin sonu-XX əsrin əvvəllərindəki Azərbaycan ədəbi-mədəni və ictimai-siyasi mühiti ilə bağlı geniş təsəvvür yaradır. İnanırıq ki, sadə, aydın dilə, rəvan və axıcı üsluba, əhatəli izah və şərhlərə malik bu kitab mütəxəssislərlə yanaşı, azərbaycanşünaslıqla maraqlanan oxucularda da böyük maraq doğuracaq.